آرشیف

احمدشاه دین‌دوست، والی طالبان در غور با انتقاد از روند کار مؤسسات کمک‌رسان، فعالیت این نهادها را متوقف کرده است.

 دفتر مطبوعاتی والی غور امروز (سه‌شنبه، ۲ حمل) با نشر خبرنامه‌ای گفته است که آقای دین‌دوست در جلسه‌ای از رییسان سکتوری این ولایت خواسته است تا متوجه «حرکات مؤسسات» غیر دولتی باشند.

به نقل از این خبرنامه، والی طالبان در غور گفته است هدف «مؤسسات خدمت به مردم نیست و تمام ارقامی را که ارایه می‌کنند دروغ است». او گفته است که مؤسسات غیردولتی حاضر نیستند ارقام دقیق ارایه کنند.

در این راستا، عبدالواحد حماس، سخن‌گوی والی طالبان در غور می‌گوید که فعالیت ۲۰ مؤسسه غیردولتی در این ولایت متوقف شده و اجازه فعالیت ندارند.

مسئولان برخی از مؤسسات غیردولتی در ولایت غور هم توقف فعالیت‌شان‌را تأیید می‌کنند.

فعالیت مؤسسات غیردولتی در حالی از سوی مسئولان محلی طالبان در ولایت غور متوقف می‌شود که اکنون ساکنان این ولایت نیاز جدی به کمک‌های بشردوستانه دارند.